Kok kini Lapuak dek ujan lakang dek panehBalam jo barabah jadi pikatanKarakatau tinggi manjulangBumi lampuang labuhan panjangSalam jo sambah kami sampaikanKa urang rantau Lai ko sanangKami di kampung baarok pulang.....Assallamualikum warohmatullah wabarokatuh,
Hai dunsanak kami dirantau,sabalunnyo kami doakan semoga dunsanak nan dirantau selalu dalam lindungan nan kuaso ,iduik sanang rasaki banyak ,galeh batambah laku juo,anak sikola batambah tinggi,itu harapan kito basamo.
Baitu pulo kami di kampuang nan tingga di nagari,mamaliharo adek nan lamo,marambah manuga ladang,manapak pamatang sawah,bacucuak batanam padi,manjago sako jo pusako,nak jaan lapuak dimakan umua nak jaan hilang di tutuik samak.
Bak kato urang tuo-tuo sayang dianak dilacuti,sayang di kampung batinggakan, sayang di adek dibiasokan ,sayang jo agamo kito sumbayang.
Lai ado bana nan kakami sampaikan ka dunsanak nan dirantau,nak tau anak jo bapak,nak tau kamanakan jo mamak,nak jan lupo jo tapian.acok-acok dunsanak pulang.Lubuak pinyaok kini lah rusak tatimbun dek tanah runtuah,jalan ketek kini lah samak dek lah jarang di lalui,lurah kariang,talago dangka dek mato aia banyak nan ilang.Rumah gadang banyak nan lapuak,surau jo masajik lah mulai langang,ranah jo kampung nan managgungkanKok adek lah mulai tasuruak ,agamo rusak dek budayo urang,ninik jo mamak kurang bijak,gadih jo bujang basilanteh angan.
Ado bana cadiak jo pandai,indak bapihak ka nan bana.Nan cadiak indak lai ma aja ,nan padai indak lai jadi guru..
Nan cadiak kini mamakan nan bodoh,nan pandai kini manipu nan bingungNan kuek musuh nan lamah,nan ba kuaso batangan basi.nan kayo manapuak dado.
Ninik jo mamak indak bapungsi,dek karih jarang diasah,dek saluak jarang di cuci,tungkek lamo batambah lapuak.bundo kanduang indak badayo,dek baju kurung tangga jaitan,salendang jarang dipakai kain panjang di makan anai.
Imam jo bila duduak manangih,kaji lupo surek lah hilang,guru lah lamo dek maningga,batambah gadang doso di tanggung.
Baitu pulo urang mudo,lamak banyak badan manjadi,indak ado urang pado awak di kacak langan bak langan di kacak paho bak paho,adek indak paralu lai,agamo urusan tuo,ndak ado sopan jo santun ,urang tuo dipandang kuno,dunia diraso milik nyo surang.
Nan gadih lupo jo baju kuruang,apo lai tikuluak jo talakuang,basarawa pendek baju marangsang,aurat tabuka rambut nyo pirang,pagi-pagi duduk dijanjang manjua tanpang mangoda urang,indak paduli gaek atau bujang nan paralu lai bisa sanang ,kok siang suko batandang,malam bagadang labiah dari bujang,pulang subuah hal biaso,dek urang tuo indak badayo.